Bihotzeraino iristen den horietakoa izan da XI. Euskararen Maratoiaren amaiera. Afaltzera eseri eta Aire Eire taldearen doinupean bete dituzte sabelak. Digestioa egiteko makina bat aldiz altxarazi dituzte afaltiarrak zortzikoteko kideek: 'Piztu', 'Bero-bero'... izan dira dantzatu dituzten abestiak. Eta horixe bera izan da Kukukako ikasleek ongien egiten dakiten gauzetako bat, dantza: 25. urteurreneko egitaraua aurkeztu eta zenbait taldek emanaldiak egin dituzte, baita beteta zegoen Okendo plaza osoa lotu duen soka dantza ere. Ondoren, Agus Mujikak irudimen mugaezina duela erakutsi du eta Anje Duhalde zein Benito Lertxundi imitatu ditu, ondoren DJ Armin bihurtu eta enparantza hankaz gora jartzeko. Estasi une horien ostean erritmoa jaitsi eta zortzikoteko kideek bihotzetik hitz egin diete parean zituzten dozenaka pertsonei. 40 orduotan bizitakoagatik eskerrak eman eta gaurtik aurrerako erronkan jarri dute fokua: Lasarte-Oria gero eta euskaldunago baten alde lan egitea. Hori da eguneroko maratoia.